Muqdisho(SONNA):- Masuuliyiin ka tirsan Wasaaradda Arrimaha Dibadda Xukuumadda Federaalka Soomaaliya iyo Safiirka Shiinaha ee Soomaaliya Wang Yu oo ay wehliyaan diblomaasiyiinta safaaradda ayaa Muqdisho kulan dhiirrigelin iyo soo dhaweyn ah ugu sameeyay 20 diblomaasi da’yar ah oo wax lagu soo baray dalka Shiinaha.
20-kan diblumaasi oo da’yar ah ayaa soo dhameystay barnaamij tababar iyo booqasho waxbarasho ah oo ay ku tageen magaalooyin kala duwan oo dalka Shiinaha ah, kuwaas oo ujeedkoodu ahaa kor u qaadidda fahamka ku aaddan istaraatiijiyadaha horumarineed ee Shiinaha iyo xoojinta xirfadooda diblumaasiyadeed.
Intii ay joogeen magaalada Beijing, diblumaasiyiintan ayaa kulan dhiirrigelin leh la yeeshay Danjiraha Jamhuuriyadda Federaalka Soomaaliya ee Shiinaha, Dr. Hodan Osman. Kulankaas ayaa noqday fursad ay dhalinyaradu ku wadaagaan waayo-aragnimadooda, halka safiirkuna ay ku boorrisay in aqoonta iyo aragtiyaha ay kasbadeen ay dib ugu celiyaan dalkooda hooyo si ay door muuqda uga qaataan horumarka Soomaaliya.
Barnaamijkani waxa uu astaan u yahay iskaashi miro-dhal ah oo u dhaxeeya Soomaaliya iyo Shiinaha, isaga oo adkaynaya xiriirka laba geesoodka ah iyo ka go’naanta labada dal ee ku wajahan horumarinta mustaqbalka ay wadaagaan.
