Turin(SONNA)- Macallinka kooxda kubadda cagta Juventus ee Maurizio Sarri ayaa la soo warinayaa inuu doonayo inuu la soo saxiixdo saddex laacib labada suuq kala iibsi ee soo aaddan.
Inkastoo la sheegayo in ay tahay in ay kooxda Juventus ay iibiso ciyaartoy, wali ma aysan joogsan wararka la isla dhexmarayo ee ku saabsan inay suuro-gal tahay inay kooxda haysata horyaalka Serie A soo iibsato ciyaartooy kale.
Sida uu warinayo warsidaha Ilbianconero, macallin Sarri ayaa diiradda ku haya inuu soo qaato labada laacib ee uu la soo shaqeeyey xilli ciyaareedkiisii ugu dambeeyey ee Chelsea kuwaasoo kala ah Emerson Palmieri iyo N’Golo Kante.
Wararku waxaa kale oo ay intaa ku darayaan in kubbad-sameeyaha kooxda Tottenham Hotspur ee Christian Eriksen uu yahay bartilmaameedka kale ee macallin Sarri oo doonaya inuu keeno Turin.
Inkastoo heshiiska wadajir ka ah ee Palmieri iyo Kante ayaa Juventus ugu kici kara qiyaastii 90 milyan oo gini, Eriksen ayaa haatan qarka u saaran inuu si xor ah uga tago kooxdiisa Spurs xagaaga soo socda.
