Muqdisho.(SONNA):- Madaxweynaha Jamhuuriyadda Federaalka Soomaaliya Mudane Xasan Shiikh Maxamuud ayaa ka qeyb galay Meertada 36-aad ee Shirka Madaxda Midowga Afrika oo ka socda magaalada Adis Ababa ee caasimadda dalka Itoobiya.
Madaxweynaha oo Khudbad ka jeediyay shirka ayaa ka hadlay guulaha laga gaaray dhinacyada amniga sida la dagaallanka Khawaarijta, arrimaha dhaqaalaha iyo arrimaha siyaasadda, wuxuuna si gaar ah u bogaadiyay taageerada Midowga Afrika ee dowladaha xubnaha ka ah ay la garab taagan yihiin Soomaaliya.
Sidoo kale, madaxweynaha Jamhuuriyadda Federaalka Soomaaliya Mudane Xasan Shiikh Maxamuud ayaa kullamo doceedyo muhiim ah la yeeshay madaxda Midowga Afrika ee shirka ka qeyb galay sida Ra’iisul wasaaraha dalka Ethopia mudane Abey Ahmed, Madaxweyneyaasha Burundi Mudane Évariste Ndayishimiye iyo Tanzania Marwo Samia Suluhu Hassan, dhiggiisa Madaxweynaha Jamhuuriyadda Rwanda Mudane Paul Kagame iyo madax kale, kuwaas oo uu dhammaantood kala hadlay xoojinta xiriirka u dhaxeeya labada dalka iyo sidii la iskaashi loo sameyn lahaa, xaaladda Gobolka Geeska Afrika, arrimaha dhaqaalaha iyo dardar galinta howlgallada lagu ciribtirayo Khawaarijta ee ka socda dalka.
Dr. Xasan Shiikh Maxamuud ayaa rejo wanaagsan ka muujiyay in wadajir, shaqo adag iyo ballanqaad siyaasadeed oo dhab ah, Soomaaliya ay ka guulaysan doonto caqabad kasta,isla markaana ka dhabeyn doonno isbaddallada cadcad ee siyaasadeed, dhaqan-dhaqaale iyo amni ee aan ku hoggaaminaynno dalkeenna.
Dowladdiisu ayuu tilmaamay in ay diiradda saari doonto dhisidda jawi lagu heli karo horumar waari-og oo baahida dadka ku salaysan, iyadoo lagu bilaabayo sidii nabadda uga ilaashan lahayn ururka argagigixisada caalamiga ah ee Al-Shabaab lana kaashanaynna dhammaan bahwadaagteenna caalamiga ah.
Madaxweynaha oo sii hadlaya ayaa yiri “Hal-ku-dheggaygii doorashada ee guulaystay wuxuu ahaa “Soomaali heshiis ah, dunidana heshiis la ah”. Waxay tani caddayn u tahay sida dowladdaydu si firfircoon u baadigoobayso inay xoojiso dhammaan xiriirrada ay horey ula lahayd saaxiibbada caalamiga ah iyo sidii ay cilaaqaad hor leh ula samaysan lahayd kuwo kale si aan u xaqiijinno inaan dhammaanteen wadaagno horumarka iyo barwaaqada maanta caalamka ka jira”.
Madaxweynaha ayaa u mahad celiyay dhammaan soo dhowaynta diirran ee loo sameeyay, isaga oo tilmaamay in ay ka go’an tahay la shaqeynta Midowga Afrika, dowladaha xubnaha ka ah iyo dhammaan bahwadaagteenna qaalliga ah looga dhigo Soomaaliya, Afrika iyo adduunka meel nabdoon, horumarsan, barwaaqo u ah muwaadiniinteenna oo idil.
Caqabadaha ugu waa weyn ee Soomaaliya haatan wajaheyso lana doonayo in si wadajir ah looga gudbo ayuu ku sheegay madaxweynaha la dagaallanka argagixisada caalamiga ah, la tacaalidda isbaddalka cimilada, kobcinta dhaqaalaha, abuurista shaqooyinka iyo sida maalgalinta ajandayaasha horumarineed ee adduunka sida kuwa ku xusan Ajandaha 2030 ee Horumar Waari-og ee Qaramada Midoobay.
Dhanka kale, madaxweynaya ayaa dul istaagay howlgallada ka dhanka Khawaarijta ee ka socda dalka, wuxuuna qiray in horumar waa weyn laga gaaray, meelo badana laga xoreeyay Khawaarijta, wuxuuna ku bogaadiyay ciidanka qaranka dadka deegaanka iyo saaxiibada caalamiga oo iska kaashanaya howlgalladaas.
Warbaahinta Qaranka ayaa ogaatay in weerarkii ugu dambeeyay ee kooxda Khawaarijta looga dilay xubno muhiim ah oo ka tirsan kooxda Khawaarijta. Howlgalkan oo ay si wadajir ah u fuliyeen ciidamada dowladda Soomaaliya, kuwa deegaanka, iyo saaxiibada caalamiga ah ayaa lagu dilay in ka badan 300 oo ka tirsan kooxda Khawaarijta ah meelaha ay kaga dhuumaalaysanayaan deegaanada maamulada Hirshabeelle, Galmudug iyo Jubbaland
