Paris(SONNA)-Paris Saint-Germain ayaa lagu soo waramayaa inay isku diyaarinayso inay kaga guuleysato kooxda Manchester United tartanka loogu jiro saxiixa daafaca kooxda Napoli ee Kalidou Koulibaly.
Xiddiga heerka caalami ee dalka Senegal ayaa la filayaa inuu isaga tagi doono kooxdiisa Napoli kuna biiri doono koox cusub dhammaadka xagaagan, iyadoo kooxdiisa haatan la sheegay inay diyaar u tahay inay lacag ku hesho saxiixiisa.
Horraantii bishaan Wargeysyadda ugu waa weyn ee kubadda cagta ka faallooda ayaa soo jeediyay in Man United ay safka hore kaga jirto doonista 28-sano jirka difaaca kaga ciyaara Napoli ee Kalidou Koulibaly kaasoo loo arko inuu yahay mid ka mid ah daafacyada dhexe ugu fiican ee haatan ka ciyaara guud ahaanba qaaradda weynta Yurub.
Si kastaba ha ahaatee, warsidaha ka soo baxa Waddanka Talyaaniga ee La Gazzetta dello Sport ayaa sheegaya in kooxda ay carabtu leedahay ee PSG ay diyaar u tahay inay Koulibaly ku soo jiidato mushaharaad badan kuna wareejiso qandaraas ka weyn midka uu ku heli doono garoonka Old Trafford.
Warbixinta ayaa sheegaysa in wadahadallo horey u dhexmaray wakiilka ciyaaryahanka iyo agaasimaha isboortiga Kooxda PSG ee Leonardo ay sal dhig u noqon doonaan in kooxda Manchester United lagaga adkaado raacdada loogu jiro adeegga xiddigan heerka caalami ee Senegal.
Hoggaamiyeyaasha horyaalka Ligue 1 ayaa la sheegay inay ku faraxsan yihiin inay siinayaan Koulibaly heshiis qiimihiisu yahay 10.2 milyan oo gini xilli ciyaareedkiiba ayna ka saxiixan doonaan heshiis gaaraya illaa sanadka 2024-ka.
