Muqdisho.(SONNA):- In dhawaalaba intii kooxda Khawaarijta Al-sabaab ay galeen maalmahoodii dhammaadka, waxaa sii xoogeysanayay cadaadiska haysta horjoogayaasha kooxda, iyagoo labo dhinac u kala qeybsamay sidii uu mustaqbalkooda noqon lahaa.
Horjoogayaal ka tirsan kooxda waxay soo jeediyeen in aysan u babac dhigi Karin duulaanka ku soo wajahan marka ay eegeen cududda ciidamad qalabka sida iyo xoogagga xoreynta deegaanka oo isgarabsanaya oo ku wajahan meelaha ay ku harsan yihiin deegaannada Galmudug ay go’aansaeen in ay isaga baxaan, halkaa iyagu doonaya qaarkood in ay isa soo dhiibaan.
Balse, waxaa jira horjoogayaal wali Khawaarijnimnada ku fogaatay oo doonaya in ay dagaallamaan, iyagoo dagaallamayana ifka laga qariyo.
Warar aynu ka helnay degmada Ceelbuur ee gobolka Galgaduud ayaa xaqiijiyay in habeenimadii axadda ee isniintu ay soo galeysay, Ceelbuur afurkii ka dib uu ka dhacay shir dhexmaray horjoogayaal ka tirsan maleeshiyada kooxda Al-shabaab iyo qaar ka mid ah odayaasha dhaqanka. Shirkaas waxay odayaasha dhaqanka Khawaarijta kaga dalbadeen in laga bilaabo saacadaas la joogo hubka ay kooxdu ku heysatay Ceelbuur iyo nawaaxigeeda ay la wareegaan odayaasha dhaqanka ama qabiilada si hubka looga dhigo, hub ay beelo leeyihiin, ka dibna maleeshiyaadkii hubkaas heystay lagu dhex daro dadka deegaanka, iyaga oo loo ekeysiinayo in ay yihiin da rayid ah.
Horjoogayaashu waxay go’aansadeen in ay Ceelbuur iyo nawaaxigeeda ka baxaan iyo guud ahaanba Galmudug, maaddaama joogitaankoodii iyo ku noolaanshaha mustaqbalkoodii Galmudug gabi ahaanba uu meesha ka baxay.
Horjoogayaasha shirkaas qeybta ka ahaa waxaa ka mid ahaa, horjooge Siciid Axmed Gaagaale oo ka soo jeeda deegaanka Ceelgaras ee gobolka Galgaduud. Siciid Gaagaale waxaa la xaqiijiyay in odayaasha uu ku amray in hubka guud ahaanba ay la wareegaan, hubkaasina uu noqdo mid beeleed, iyadoo horjoogayaasha hubkaas heystay eek a tirsanaa Khawaarijta Al-shabaabna ay banneyn doonaan Galmudug, sida uu hadalka u dhigay Siciid Gaagaale.
Wareejinta Siciid Gaagaale, hubka uu ku wareejinayo odayaasha dhaqanka waxaa daba daal hanjabaad uu ugu hanjabayay in hubka yahay hub Shabaabku ka rabi doonaan odayaashu haddii ay fursad u helaan in ay ku soo laabtaan deegaankan.
Horjooge Siciid Axmed Gaagaale, waxaa la socda dhowr horjooge kale oo isaga heyb ahaan aad ugu dhow iyo kuwo kale, oo aan ku heyb ahayn, balse, Ceelbuur ka soo jeeda. Odayaasha dhaqanka, maaddaama hadda Ceelbuur ay joogaan Khawaarijta Al-shabaab malahan iqtiyaar ay ku kala doortaan ama ay ku diidaan warka horjoogaasha Al-shabaab ugu yimid, balse waxaa u furan oo kaliya warka loo sheego ay qaataan si naftooda iyo maalkooda ay uga badbaadsadaan.
Horjoogayaasha maleeshiyada Khawaarijta Al-shabaab wixii ka dambeeyay shirkii dhawaan degmada Ceelbuur ka dhacay ee ay ku kala tageen oo ay ku kala qeybsameen in Ceelbuur iyo nawaaxigeeda ay Al-shabaab difaacan karaan iyo in kale, ayna garowsadeen in hadda aysan awoodin in ay difaacdaan degmada,islamarkaana ay go’aansadeen dhammaantood in Ceelbuur ay ka baxaan iyagoo rayid ah.
Ceelbuur waxay ka mid tahay meelaha dhowr iyo tobanka sano Khawaarijta Al-shabaab dadkeeda ay aadka ugu dhibaateynayeen, hadda’se waxay ku jiraan maalmihii ugu dambeeyay joogitaankooda Ceelbuur iyo meelaha la midka ah.
