Faallo: Gobolka Banaadir ayaa si rasmi ah u billaabay ololaha doorashooyinka deegaanka, iyadoo la diyaarinayo doorashooyinka golayaasha deegaanka ee lagu wado in la qabto 30-ka bisha November ee sanadkan.
Tallaabbadani waa mid taariikhi ah oo aan hore loo arag ku dhawaad nus Qarni, taas oo muujinaysa isbeddel weyn eeย ku saabsan ka-qaybgalka shacabka iyo xoojinta nidaamka maamulka hoose ee caasimadda Muqdisho, siย loo doorto maamul hoosaadka degmoonka Gobolka Banaadir.
Doorashadan ayaa imaneysa kadib muddo dheer oo uu dalka ka jiray nidaam maamul dhexe ah, waxayna fursad cusub siisneysaaย shacabka Muqdisho in ay si toos ah u doortaan wakiilladooda golayaasha deegaanka iyo Guddoomiyaha Gobolka Banaadir ahna Duqa Magaalada Muqdisho, taas oo calaamad u ah bisaylka iyo koboca nidaamka dimuqraadiyadeed ee dalka.
Maalmihiiย la soo dhaafay waxaa magaalada Muqdisho ka socday ol-ole xooggan oo ay wadaan xisbiyada siyaasadeed, kuwaas oo si tartan ah ugu diyaar garoobaya doorashada, iyadoo sidoo kale la diiwaangeliyey kumannaan qof oo muwaaddiniin ah, kuwaas oo horey isugu qoray liiska codbixiyayaasha si ay uga qaybqaataan doorashada soo socota.
Dhinaca kale, Xisbiga Caddaaladda iyo Wada jirka (JSP) ayaa si rasmi ah u shaaciyey inuu u doortay Dr. Xasan Maxamed Xuseen (Muungaab) Guddoomiyaha hadda ee Gobolka Banaadir in uu noqdo musharraxa rasmiga ah ee xisbiga u tartamaya xilka Guddoomiyaha Gobolka iyo Duqa Muqdisho.
Kuxigeenka Xoghayaha Guud ee Xisbiga, Dr. Xuseen Sheekh Maxamuud, oo shir jaraaโid ku qabtay magaalada Muqdisho, ayaa sheegay in xulashada Dr. Muungaab ay timid iyadoo lagu qiimeeyay khibraddiisa maamul iyo dadaalkiisa muuqda ee ku aaddan horumarinta Caasimadda.
Dhankiisa, Wasiirka Qorsheynta, Maalgashiga iyo Horumarinta Dhaqaalaha, Mudane Maxamuud Sheekh Faarax, oo ka tirsan isla xisbiga, ayaa sheegay in doorashada hoggaanka Gobolka Banaadir ay tahay tallaabo dimuqraadiyadeed oo muhiim ah, isla markaana uu rajaynayo in xisbiyada Qaran ay keeni doonaan isbeddel la taaban karo oo muuqda.
Dr. Muungaab, oo ah musharraxa xisbiga, ayaa sheegay in shacabka Soomaaliyeed ay mudan yihiin dowlad casri ah oo leh karti, daahfurnaan, iyo tartan dhanka horumarka ah.
Dhanka kale, Xisbiga Dadka Soomaaliyeed ayaa isna si rasmi ah u billaabay ololihiisa doorasho, iyadoo xafladdiisa lagu qabtay barxadda Taallada Daljirka Dahsoon ee bartamaha magaalada Muqdisho.
Boqollaal taageerayaal ah ayaa goobta isugu yimid, iyagoo muujinaya xiise iyo kalgacal siyaasadeed oo xoog leh.
Guddoomiyaha xisbiga, Mudane Cali Maxamed Nuux, ayaa isna sheegay haddii ay shacabku codkooda ku aaminaan, ay kor u qaadi doonaan mushaharka ciidanka, isla markaana ay mudnaanta siin doonaan baahiyaha aasaasiga ah ee shacabka.
Sidoo kale, Xoghayaha guud ee xisbiga, Mudane Maxamed Nuur Jeelle, ayaa sheegay in xisbigu diiradda saari doono daryeelka bulshada nugul iyo dadka la haybsooco, halka Afhayeenka xisbiga, Mudane Cabdullaahi Maxamed Aadan uu carrabka ku adkeeyey muhiimadda mabdaโaย โHal qof iyo hal codโ, taas oo uu ku tilmaamay dammaanad lagu xaqiijinayo caddaaladda doorashada.
Doorashadaan lagu wado in ay ka dhacdo Gobolka Banaadir waxay astaan u tahay horumarka dimuqraadiyadda Soomaaliya, waxayna xoojinaysaa nidaamka maamul hoose iyo ka-qaybgalka shacabka ee dhismaha mustaqbalka Caasimaddooda, iyagoo codkooda ku muujinaya rabitaankooda siyaasadeed iyo hiigsigooda horumarineed.
