Dagaalka ka dhanka ah kooxda Argagixisada ah ee Al-shabaab ayaa shalay galab jab xooggan loogu geystay deeggaanno u dhaxeeya Waniinle ilaa iyo Cowsweyne, waxaana iska soo daba dhacaya hambalyada iyo bogaadinta loo jeedinayo Ciidaamada Xoogga Dalka Soomaaliyeed iyo kuwa Deegaanka ee ka qeybqaadatay howlgalkaasi barakeysanaa, kaasi oo looga dilay Khawaarijta isugu jirtay Horjoogayaal iyo Maleeshiyaad badan.
Durbadiiba Taliyaha Ciidanka XDS ayaa Isbitaalka ku booqday Askartii ku soo dhaawacantay furimaha dagaalka, isla maalintaasina waxa uu gaaray deegaanno ka tirsan Gobolka Galgaduud oo uu ka socdo howlgal ka dhan ah Khawaarijta.Taliyaha Ciidanka Xoogga Dalka Soomaaliya Sarreeye Gaas Ibraahim Sheekh Muxyadiin ayaa shalay isbitaalka ku booqday geesiyaasha XDS ee dhawaan jilibka u aastay kooxaha arxan-laawayaasha ee isku dayay inay dhibaateeyaan Shacabka deegaanka Waniinle oo 10 KM u jira Magaalada Ceeldheer, islamarkaana waxay u dhaxeysaa Degmada Ceeldheer iyo Magaalada Masagawaa ee Gobalka Galgaduud.
Geesiyaasha Xoogga Dalka oo kaashanaya Ciidamada Difaaca deegaannka iyo saaxiibada Caalamiga ah ayaa dorraato cashar aysan hilmaami doonin u dhigay kooxaha Argagixisada ah, waxaana halkaasi looga dilay Horjoogayaal iyo Maleeshiyad badan, wuxuuna taliyuhu caafimaad qab buuxda u rajeeyay Askarta geesiyaasha ah ee awoodooda u muujiyay cadawga arxanka daran, isagoo dhaqaatiirta kula dardaarmay inay ciidanka ku bixiyaan dadaal dheeraad ah, sidoo kale waxaa uu alle uga baryay in Jannatul firdowsa uu ka waraabiyo geesiyaashii ku Shahiiday Howlgalkaasi.
Sidoo kale Taliyaha ciidanka dhulka ee xoogga dalka Somaliyeed Jeneraal Dayax Cabdi Cabdulle ayaa shalay galabta gaarey Aaggii lagu dagaalamay ee deegaanada Waniinle iyo Dhagaxyaale oo uu ka soconayo howlgal ballaaran oo Khawaarijta jab xoog leh lagu gaarsiiyay, wuxuuna Jeneraal Dayax taliyaha ciidanka dhulka ayaa ciidamada iyo saraakiisha ku sugan deegaannadaasi lagu baacsanayo cadawga ee hoostaga Ceeldheer ku dhiiri-geliyay guulaha ay soo hooyeen iyo jabka baaxadda leh ee ay ku naafeeyeen khawaarijta isku aruursaneysay dhulka howdka ah, oo wali meydadkooda haaddu cuneyso.
Taliyaha Ciidanka Dhulka Gen. Dayax Cabdi Cabdulle oo ku sugan jiidaha hore ee lagula dagaallamayo khawaarijta ayaa Ciidanka xoogga ku ammaanay dhabar adeyga iyo ka mira dhalinta hadafka naf hurnimada leh ee lagu naafeeyay cadowga, wuxuuna ku bogaadiyay ciidanka Xoogga dalka iyo kuwa deegaanka shaqada culus ee ay shalay ka qabteen kooxda canasirta ah ee khawaarijta ah, waxa uuna taliyuhu faray Saraakiisha iyo ciidanka in la xoojiyo shaqada qaran ee loo idmaday. Gen. Dayax Cabdi Cabdulle ayaa booqday fariisimaha Ciidanka Xoogga iyo madaalayaasha deegaanka, wuxuuna ciidanka naf hurnimada sameeyay ugu hambalyeeyay mas’uuliyadda iyo kartida ay muujiiyen oo ah dabar goynta argagixisada.
Dowladda Federaalka Soomaaliya ayaa war saxaafadeed kasoo saartay howlgallo qorsheysan oo saacadihii lasoo dhaafay laga fuliyay gobolka Galgaduud, kaas oo lagu laayay khawaarij ka badan 50 xubnood. Howlgalkan ayaa waxaa si wada jir ah u fuliyay Ciidanka Qaranka, geesiyaasha dadka deegaanka iyo Saaxiibada Caalamka, kaasi oo ka dhacay deegaanka Dhabaqle oo ku yaalla inta u dhaxeysa magaalada Masagaway iyo deegaanka Cawsweyne ee gobalka Galgaduud.
Xubnaha lagu laayay howlgalkaan ayaa isugu jira horjoogayaal iyo malleeshiyaad Khawaarij ah, waxaana howlgalku uu ka dambeeyay markii Ciidanka Xoogga Dalka iyo ciidamada degaanka ay heleen xogta ah’ in cadowga oo isku aruursanayay halkaasi’, waxaana la soo warinayaa in Geesiyaasha Ciidanka Qaranka iyo dadka deegaanka ay hadda ku sugan yihiin goobihii dagaalku ka dhacay, iyadoo weli lagu raad joogo Malleeshiyaad fara ku tiris ah oo isku dayaya in ay naftooda la baxsadaan.
Haddba waa side xaalka Magaalada Ceeldheer? Wararka ka imaanaya Magaalada Ceeldheer ayaa sheegaya in Degmooyinka bariga Galgaduud dhamaantood shalay ilaa Xlay ay ahaayeeen ‘lacag la’aan Maqaayadahooda goobaha lagu shaaheeyo waa free’, taasi oo ay ugu dabaaldagayaan guushii ay gaareen kooxda Khawaarijta ah ee Al-shabaab, islamarkaana la gaarsiiyay jabkii ugu weynaa ee loo geysto kooxdaasi qowleystada ah, waxaana maalintaasi looga dilay 57 ka tirsan Maafiyada markii shalay deegaannada u dhaxeeya Waniinle iyo Cowsweyne dhegta dhiigga loogu daray. ‘GUUL IYO GOBONIMO’ ayaan u rajeyneynaa intii ka qeybqaadatay howlgalkaai barakeysnaa.
“Waa ka xumay in Dad Mas’uuliyiin ah ay macaash siyaasadeed ka raadiyaan cadowga Ummadda Soomaaliyeed oo ay ugu horreyso Khawaarijta ay nooleeyaan, balseay la yimaadaan aragtiyo ay wax ku dhisi karaan, iyagoo cabsi ka qaba guulaha is daba jooga ah ee ay dowladdu gaareyso inay cudur daar ka dhigtaan Shabaab ayaa nool oo aan ognahay waxa lagu sameeyay khawaarjita ay arkayaan shacabka Soomaaliyeed, waxa ay dowladdu sameyneyso, dabcan waa dabci xun iyodhaqan siyaasadeed xun oo liita, waxaana laga filan karay inuu aragti dowladnimada dhiseysa oo wax u kordhineysa la yimaado, laakiin uu jeclaan lahaa guulaha Khawaarijta, si uu Idaacad u soo koro oo uu sheego waxyaaba qaldan”, sidaasi waxaa yiri:- Wasiir ku xigeenka Warfaafinta Mudane Cabdiraxmaan Yuusuf Cadaala.
Taa waxaa daliil u ah Qolyahaasi marna ma soo hadal qaadin guushii weyneyd ee gaareen Ciidamada Xoogga Dalka Soomaaliyeed iyo kuwa deegaanka oo shalay dagaal faraha la isaga gubtay ka dhacay deegaannada u dhaxeeya Waniinle ilaa Cowsweyne,guushii, balse haddii ay wax yar oo guul ah ay helaan Khawaarijta aad bay u buun-buunin lahaayeen, ‘dowladdu waxay ku fashilantay dagaalka’, ayay dhihi lahaayeen, waa sida caadadood ah.
By. C/lahi Ruush
