𝐖𝐚𝐟𝐝𝐢 𝐤𝐚 𝐬𝐨𝐜𝐝𝐚 𝐗𝐚𝐟𝐢𝐢𝐬𝐤𝐚 𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐚𝐡𝐚 𝐨𝐨 𝐛𝐨𝐨𝐪𝐚𝐬𝐡𝐨 𝐫𝐚𝐬𝐦𝐢 𝐚𝐡 𝐤𝐮 𝐭𝐞𝐠𝐚𝐲 𝐓𝐚𝐧𝐳𝐚𝐧𝐢𝐚

Muqdisho,(SONNA):- Wafdi ka socda Xafiiska Ra’iisul Wasaaraha XFS oo uu hoggaaminayo Wasiiru Dowlaha Xafiiska Ra’iisul Wasaaraha, Mudane Xirsi Jaamac Gaani, ayaa soo gabagabeeyey booqasho saddex maalmood ah oo uu ku tegay Tanzania.

Booqashada ayaa diiradda lagu saaray dib-u-habaynta adeegyada dowladda, casriyeynta habraacyada Golaha Wasiirrada, dowladnimada dijitaalka ah, shaqo-abuurka iyo xirfadeynta shaqaalaha dowladda.

Wafdiga ayaa kulamo la yeeshay hay’adaha Tanzania, si ay uga bartaan khibradaha dalkaasi ee maamulka waxqabadka, e-Cabinet, adeegyada dijitaalka ah, is-dhaafsiga xogta iyo amniga cyber-ka. Sidoo kale, wuxuu booqday Tanzania Public Service College (TPSC), iyada la isku afgartay diyaarinta Heshiisyo Is-afgarad oo ku saabsan tababarro iyo is-weydaarsiga aqoonta.

Sidoo kale intii ay booqashada ku joogeen dalkaas, waxa ay la kulmeen ganacsatada Soomaaliyeed ee Tanzania, waxaana ay ka wada hadleen fursadaha maalgashi iyo xoojinta xiriirka dhaqaale ee labada dal.