𝐑𝐚'𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐗𝐚𝐦𝐬𝐚 𝐨𝐨 𝐤𝐚 𝐪𝐞𝐲𝐛-𝐠𝐚𝐥𝐚𝐲 𝐦𝐮𝐧𝐚𝐚𝐬𝐚𝐛𝐚𝐝𝐝𝐚 𝐜𝐚𝐥𝐞𝐞𝐦𝐚-𝐬𝐚𝐚𝐫𝐤𝐚 𝐡𝐨𝐠𝐠𝐚𝐚𝐧𝐤𝐚 𝐜𝐮𝐬𝐮𝐛 𝐞𝐞 𝐇𝐢𝐫𝐬𝐡𝐚𝐛𝐞𝐞𝐥𝐥𝐞

Jowhar,(SONNA):- Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, ayaa ka qeyb-galay munaasabadda caleema-saarka hoggaamiyaha cusub ee dowlad-goboleedka Hirshabeelle Mudane Cali Cabdullaahi Xuseen iyo ku-xigeenkiisa Mudane Cabdifataax Xasan Afrax oo maanta ka qabsoontay magaalada Jowhar.

Ra’iisul Wasaaraha oo munaasabadda ka hadlay ayaa hambalyeeyay hoggaanka cusub iyo hey’adaha dowladda Hirshabeelle kuwaas oo ku yimid hab doorasho qof iyo cod ah.

Ra’iisul Wasaaraha ayaa ka qeybgalka xafladda ka sokoow la kulmay hoggaanka maamulka oo uu ka dhagaystay horumarada ay Hirshabeelle ku talaabsatay dhanka fidinta adeegyada guud, hirgalinta mashaariicda, sugista amniga mid ka mid ah magaalooyinka ugu dadka badan dalka , iyo fududeynta iskaashiga heerarka kala duwan ee dowladda.

Mudane Xamsa ayaa hoggaamiyaha Hirshabeelle iyo madaxda kale ku adkeeyay dhamaystirka arrimaha dib u heshiisiinta iyo dhammaynta wixii tabasho ah oo jira.

“Hirshabeelle wax badan baa u qabsoomay, mashaariic badan baa ka fuley, kuwa kale ayaa socda, qaar kalena waa qorsheysanyihiin, waxaase saldhig u ah amniga iyo wadajirka “ ayuu yiri Ra’iisul Wasaare Xamsa.

Mudane Xamsa oo si gaar ah ula hadlay shacabka reer Hiiraan ayaa ugu baaqay in ay halkii kasii wadaan halgankii ay kula jireen cadawga Khawaariijta , isaga oo dhanka kale sheegay in tabashooyinkooda la xalin doono.