𝐑𝐚,𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐊𝐮-𝐱𝐢𝐠𝐞𝐞𝐧𝐤𝐚 𝐋𝐚𝐛𝐚𝐚𝐝 𝐞𝐞 𝐗𝐅𝐒 𝐨𝐨 𝐠𝐮𝐝𝐝𝐨𝐨𝐦𝐢𝐲𝐚𝐲 𝐬𝐡𝐢𝐫 𝐥𝐚𝐠𝐮 𝐚𝐧𝐬𝐢𝐱𝐢𝐲𝐚𝐲 𝐐𝐨𝐫𝐬𝐡𝐚𝐡𝐚 𝐐𝐚𝐫𝐚𝐧 𝐞𝐞 𝐄𝐥 𝐍𝐢𝐧̃𝐨

Muqdisho-(SONNA)-Ra’iisul Wasaare Ku-xigeenka Labaad Xukuumadda Federaalka Soomaaliya, Mudane Jibriil Cabdirashiid Xaaji Cabdi , ayaa guddoomiyay kulan heer wasiir ah oo diiradda lagu saaray u-diyaargarowga El Niño 2026–2027 iyo xoojinta isku-duwid ay Dowladda u dhantahay.

Kulanka waxaa lagu soo bandhigay Qorshaha Qaran ee U-diyaargarowga El Niño 2026–2027, oo ah qorshe mideynaya dadaallada iyo masuuliyadaha hay’adaha kala duwan ee Dowladda Federaalka Soomaaliya, Dowlad-goboleedyada iyo dowladaha hoose, si loo xaqiijiyo diyaar-garow isku-duwan oo ay asaas u tahay saadaasha iyo digniinta.

Qorshaha Qaran ee U-diyaargarowga El Niño ayaa maanta la ansixiyay, iyadoo la adkeeyay muhiimadda ay leedahay in dhammaan hay’adaha ay si wadajir ah uga shaqeeyaan diyaar-garowga, tallaabooyinka horudhaca ah, ka jawaabida iyo soo-kabashada.

Qorshahan ayaa xoojinaya Isku-duwid ay dowladda u dhantahay, nidaamyada digniinta hore iyo la socodka khataraha, iyo Ilaalinta dadka, xoolaha, beeraha, biyaha iyo kaabeyaasha muhiimka ah.

Ra’iisul Wasaare Ku-xigeenka ayaa ku adkeeyay dhammaan hawl-wadeennada in awaamiirtan si hufan oo degdeg ah loo fuliyo, si loo xaqiijiyo isku-duwidda shaqada, isla-xisaabtanka iyo dardargelinta natiijooyinka la filayo.