𝐑𝐚’𝐢𝐢𝐬𝐮𝐥 𝐖𝐚𝐬𝐚𝐚𝐫𝐞 𝐊𝐮-𝐗𝐢𝐠𝐞𝐞𝐧𝐤𝐚 𝐋𝐚𝐛𝐚𝐚𝐝 𝐨𝐨 𝐱𝐢𝐥𝐤𝐚 𝐮 𝐤𝐚𝐥𝐚 𝐰𝐚𝐫𝐞𝐞𝐣𝐢𝐲𝐚𝐲 𝐰𝐚𝐬𝐢𝐢𝐫𝐫𝐨

Muqdisho,(SONNA):- Ra’iisul Wasaare Ku-xigeenka Labaad, Ahna Kusimaha Ra’iisul Wasaaraha Xukuumadda Jamhuuriyadda Federaalka Soomaaliya, Mudane Jibriil Cabdirashiid Xaaji Cabdi, ayaa Ka qeybgalay munaasabadda xil-wareejinta Wasaaradda Dekedaha iyo Gaadiidka Badda, isagoo xilka u kala wareejiyey Wasiirka cusub ee Wasaaradda, Mudane Cabdiqaadir Cumar Macallin iyo Kusimaha Wasiirka ahna Wasiiru-dowlaha Wasaaradda, Mudane Cabdiqaadir Maxamed.

“Dhankooda, mas’uuliyiinta xilka la kala wareegay ayaa laga filayaa inay sii ambaqaadaan dadaallada lagu horumarinayo waajibaadka Wasaaradda, iyadoo la xoojinayo wada-shaqaynta hay’adaha dowladda iyo bahwadaagta caalamiga ah” Ayuu yiri Mudane Jibriil oo hadal-jeedin ka sameeyay munaasabadda.

Ra’iisul Wasaare Ku-Xigeenka Xukuumadda Federaalka Soomaaliya Mudane Jibriil ayaa sheegay in qorshaha istaraatiijiyadeed ee xukuumadda ay qeyb weyn ka yihiin dadaallada lagu tayeynayo maamulka iyo adeegyada dekedaha iyo gaadiidka badda, si loo gaaro horumar waara oo waafaqsan danaha iyo mudnaanta Jamhuuriyadda Federaalka Soomaaliya.