Waziri Al-Makhzoumi, Naibu Kamishna Mkuu wa UN wajadili kuanza kazi kwa ofisi ya OHCHR nchini Somalia

GENEVA (SONNA): WAZIRI wa Familia na Maendeleo ya Haki za Binadamu wa Serikali ya Shirikisho la Somalia, Khadija Mohamed Al-Makhzoumi, amekutana na Naibu Kamishna Mkuu wa Umoja wa Mataifa wa Haki za Binadamu, Awa Dabo, jijini Geneva. Viongozi hao walijadili kuimarisha ushirikiano kati ya Serikali ya Shirikisho na Ofisi ya Kamishna Mkuu wa Umoja wa Mataifa wa Haki za Binadamu (OHCHR).

Mkutano huo ulijikita katika kuongeza msaada na ushirikiano katika kukuza na kulinda haki za binadamu nchini Somalia. Pande hizo mbili zilijadili pia juhudi za kuiwezesha ofisi ya OHCHR nchini Somalia kuanza kufanya kazi. Zilijadili pia nafasi ya ofisi hiyo katika kuimarisha taasisi za kitaifa, kuunga mkono kazi za haki za binadamu na kujenga ushirikiano wa kiufundi kati ya Somalia na Umoja wa Mataifa.

Mkutano huo umefanyika baada ya Waziri huyo kuhutubia kikao cha 63 cha Baraza la Haki za Binadamu la Umoja wa Mataifa jana, Alhamisi. Katika hotuba hiyo alitoa wito kwa ofisi ya OHCHR jijini Mogadishu kuanza kufanya kazi kikamilifu, na kwa taasisi za kitaifa na huduma za ulinzi kupewa msaada.

Dabo ni mwanasheria wa haki za binadamu kutoka Gambia. Aliteuliwa kuwa Naibu Kamishna Mkuu wa Haki za Binadamu na Katibu Mkuu wa Umoja wa Mataifa, António Guterres, baada ya kushika nyadhifa za juu katika Umoja wa Mataifa katika nyanja za haki za binadamu, ujenzi wa amani, masuala ya kibinadamu na maendeleo. Miongoni mwa nyadhifa hizo, aliwahi kuwa Mkurugenzi Mkazi wa Shirika la Umoja wa Mataifa la Maendeleo (UNDP) nchini Tanzania.

Waziri Al-Makhzoumi aliambatana na Mkurugenzi Mkuu wa Wizara, Mohamed Bashir Omar, pamoja na washauri waandamizi na wataalamu wa Wizara hiyo.

Waziri huyo aliishukuru OHCHR kwa msaada wake na kwa kuendelea kushirikiana na Serikali ya Shirikisho. Alisema Wizara itaendelea kujitolea kuimarisha ushirikiano wa kimataifa na kuendeleza ukuzaji na ulinzi wa haki za binadamu nchini Somalia.