Habari za Ndani
Baraza la Wawakilishi la Galmudug lamchagua Liban Ahmed Hassan kwa kura 72
Kiongozi huyo mpya amepata kura 72 katika Baraza la Wawakilishi la Galmudug, na ameahidi kuwa kiongozi wa kila mkazi na kila chama katika jimbo hilo.
DHUSAMAREEB (SONNA): LIBAN Ahmed Hassan amechaguliwa kuwa Kiongozi wa Jimbo la Galmudug na wajumbe wa Baraza la Wawakilishi la jimbo hilo. Amepata kura 72 katika upigaji kura uliofanyika mjini Dhusamareeb, makao makuu ya Galmudug, katikati mwa Somalia.
Kwa mujibu wa Spika wa Baraza la Wawakilishi la Galmudug, Hussein Mohamed Nur, mpinzani wake, Abdulkadir Abdullahi Diriye, alipata kura 14, na kura tatu ziliharibika. Wajumbe wote 89 wa Baraza hilo walishiriki, na kura halali zilikuwa 86.
Upigaji kura huo umefanyika baada ya uchaguzi wa marudio wa mtu mmoja kura moja wa Baraza la Wawakilishi la jimbo hilo na mabaraza ya serikali za mitaa. Uchaguzi huo ulifanyika Septemba 30, 2026, ukisimamiwa na Tume Huru ya Taifa ya Uchaguzi na Mipaka (NIEBC). Wajumbe wapya waliapishwa mapema mwezi huu. Walimchagua Hussein Mohamed Nur kuwa Spika, na Abdullahi Ahmed Ali na Mursal Abdi Adan kuwa Naibu Spika.
Akizungumza na Baraza hilo muda mfupi baada ya matokeo kutangazwa, Kiongozi huyo mpya wa Jimbo alisema ushindi huo ni wa Galmudug na wananchi wake. Alisema ni wa wanawake na vijana pia, waliosimama juani kwa saa nyingi ili kupiga kura katika duru mbili za uchaguzi. Aliwashukuru wajumbe wa Baraza kwa wingi wa kura walioumpa. Aliwashukuru pia wanazuoni, wazee, viongozi wa kimila na wafanyabiashara wa jimbo hilo.
Aliishukuru NIEBC kwa namna ilivyosimamia uchaguzi uliolazimika kufanyika mara mbili. Alimshukuru pia Kiongozi wa Jimbo anayeondoka, Ahmed Abdi Karie, akisema ndiye aliyewezesha uchaguzi wa amani, wa kuaminika na wa kidemokrasia kufanyika. Aliwashukuru pia vyama vya siasa vilivyoshiriki uchaguzi huo, pamoja na mpinzani wake, ambaye alisema alishindana vizuri.
Kiongozi huyo mpya alisema nafasi hiyo ilikuwa ikiwaniwa na wengi. Alisema atakuwa kiongozi wa kila mkazi wa Galmudug, na mlango wake utakuwa wazi kwa vyama vyote na kwa kila mwananchi.
Alisema atamtegemea Mwenyezi Mungu katika kutekeleza ahadi alizotoa wakati wa uchaguzi, na alieleza matumaini yake kuwa ataweza kuzitimiza kwa ajili ya wananchi wa Galmudug.
