Mas’uuliyiin ka tirsan Maamulka Gobolka Banaadir oo ka qeyb galay tartan horyaalka ah oo ka dhacay Garoonka Eng Yariisow Stadium “SAWIRRO”

Muqdisho (SONNA) Mas’uuliyiin ka tirsan Maamulka Gobolka Banaadir oo ay horkaceysay Guddoomiye ku-xigeenka Arrimaha Bulshada iyo Wacyigelinta, Marwo Basma Caamir Axmed, ayaa galabta daawasho u tagay kulan cayaareed aad loo wada sugaayay, kana tirsan Horyaalka Kubadda Cagta dalka oo Garoonka Eng Yariisow Stadium ku dhex maray Naadiga Dowladda Hoose ee Xamar (MCC) iyo Naadiga Horseed ee xooga dalka.

Kulanka oo ahaa mid aad u xiiso badnaa ayaa waxa ay labada Naadi soo bandhigeen cayaar aad loogu wada riyaaqay, taasi oo ku jirtay xirfad Isboorti, iyadoo labada Naadi ay isla dhaafi waayeen bar-bar dhac 0-0.

Guddoomiye Kuxigeenka Arrimaha Bulshada iyo Wacyigelinta Maamulka Gobolka Banaadir Marwo Basma Caamir Jakeetti oo intii kulan cayaareedka socday dhiira-gelin ugu tagtay Cayaartoyda ayaa waxa ay ku amaantay guulaha ay ka gaareen Horyaalka Kubadda Cagta dalka, iyadoo u rajeeysay in guulo la taabto ay kasoo hoyaan Horyaalka Kubadda Cagta Dalka.