Guddoomiyaha Golaha Shacabka oo Xafiiskiisa ku Qaabilay Madax ka socotay Hay’adda UNDP iyo UNSOM “Sawirro”

Muqdisho (SONNA)- Guddoomiyaha Golaha Shacabka Baarlamaanka Federaaalka Soomaaliya mudane Maxamed Mursal Sheekh C/raxmaan ayaa Maanta xafiiskiisa ku qaabilay masuuliyiin ka socday hay’adda UNDP iyo UNSOM.

Guddoomiye Mursal ayaa ugu horeyn la kulmay wakiilka hay’adda UNDP ee Soomaaliya H.E. Jocelyn Mason iyo madaxa arrimaha doorashooyinka ee hay’adda UNDP Mary Cummins.

Sidoo kale guddoomiyaha ayaa la kulmay sii hayaha madaxa xafiiska howlgalka kaalmeynta Qaramada Midoobay ee Soomaaliya (UNSOM) H.E. Raisedon Zenenga.

Dhamaan masuuliyiintii uu la kulmay guddoomiye Mursal waxa ay ka wada hadleen shuruucda muhiimka u ah doorashooyinka Qaranka, xoojinta wada shaqeynta dowlad goboleedyada iyo dowladda dhexe.

Waxa ay sidoo kale ka wada hadleen arrimaha deyn cafinta Soomaaliya, taageerada dhaqaale iyo midka nabadgalyo oo ay Soomaaliya u baahan tahay.

Masuuliyiintan ka socday hay’adda UNDP iyo UNSOM ayaa guddoomiyaha golaha shacabka la wadaagay barnaamijyada hormarineed oo ay ka wadaan guud ahaan dalka iyo sida ay diyaarka ugu yihiin taageerida iyo hormarinta xafiisyada kala duwan ee golaha shacabka.