Dable Ka tirsan Ciidanka xoogga dalka oo lagu xukumay dil toogasho ah

Muqdisho (SONNA)-Maxkamad Darajada 1-aad ee Ciidanka Qalabka sida ayaa go’aamisay in lagu xukumo Maxamed Cismaan Maxamed Nuur dil toogasha ah qisaasta Marxuum Cabdiraxmaan Cabdullaahi Cismaan.

Dable xoogga dalka Maxamed Cismaan Maxamed Nuur oo loo haysto dilka Alle ha u naxariiste Cabdiraxmaan Cabdullaahi Cismaan  oo uu ku dilay garoon lagu ciyaaro kubadda cagta  oo ku yaal degmada Kaxda 3-dii bishii Janayo ee sanadkan, ayaa ciidamada Amniga ee joogo qeybta galbeed  maalin kadib ku guulaystay in ay ku wareejiyaan Maxamed Cismaan Maxamed Nuur laanta dambi baarista Boliiska CID.

Xafiiska Xeer Ilaalinta Ciidamada Qalabka Sida ayaa ku dheeraaday sharaxaadda sida ay wax u dhaceen, Dhamme Ismaaciil Salaad Maxamed ku xigeenka Xeer Ilaaliyaha Guud ee Ciidamada Qalabka Sida ayaa u sheegay Garsoorayaasha in eedeysane Dable Xoogga Maxamed Cismaan Maxamed Nuur uusan ka mid aheyn dadka ku ciyaarayay garoonka ku yaal degmada Kaxda,balse uu garab siin ugu yimid wiil ay isku hayb yihiin, waxa uu meesha ka saaray Xeer Ilaaliyaha in wax wada xaajood ah dhex marin dhalinyaradii kubadda ciyaaraysay iyo eedeysanaha balse si’aan ka fiirsasha lahayn uu ugu riday laba xabadood  Cabdiraxmaan Cabdullaahi Cismaan sidaasna uu ku geeriyooday.

Gaashaanle Sare Xasan Cali Nuur Shuute, guddoomiyaha Maxkamadda Darajada Koowaad ee Ciidamada Qalabka Sida ayaa sheegay in Dambiilaha lagu xukumay dil toogasho ah, islamarkaana uu heysta  fursad  30-cisho ah oo  uu ku dalban karo Rafcaan.