Faa’iidooyinka Shirka Muqdisho ee Kooxda Xariirka Soomaaliya ee O.I.C

Faa’iidooyinka Shirka Muqdisho ee Kooxda Xariirka Soomaaliya ee O.I.C

SHARE

20,Safar,1440 Muqdisho(SONNA)– Caasimadda Soomaaliya ee Muqdisho waxay marti gelisay Shirka Kooxda Xariirka Soomaaliya ee ururka Iskaashiga Islaamka oo laga soo saaray war-murtiyeed ugu baaqaya dawladaha xubnaha ka ah OIC in ay dawladda Soomaaliya siiyaan taageero dhinacya badan.

Waa Maxay ururka Iskaashiga Islaamka?

OIC waa Urur dawladeedka Labaad ee ugu wayn dunida marka laga reebo Qaramada Midoobay, waxaana ku midaysan 57 dawladood oo Islaam ah, wuxuuna matalaa dad gaaraya 1.6 Bilyan Muslimiin ah .Waa codka midaysan ee dunida Islaamka, waxaa uu ilaaliyaa danaha muslimiinta iyo nabadda caalamiga ah

Soomaaliya iyo Dawrkii aasaaska OIC

Madaxwaynihii hore ee Soomaaliya, Aadan Cabduule Cusmaan ayaa 1967, Boqorkii Sucuudiga, Boqor faysal u soo bandhigay fikradda dhismaha urur mideeya Muslimiinta caalamka oo xuquuqdooda u dooda.

Laba sano kadib soo jeedintii Madaxwayne Aadan Cabulle Cusmaan, ayaa Boqorkii dalka Marocco Boqor xasankii 2aad wuxuu Boqor Faysal kala hadlay dhaqan gelinta soo jeedintii madaxwaynihii Soomaaliya, Waxaana OIC lagu aasaasay magaalada Rabat ee dalka  Morocco Sept. 25, 1969, iyada oo laga jawaabayo gubitaankii Yuhuudda ee  Masjidka wayn ee Al-Aqsa.

Maxaan ka naqaan Kooxda Xariirka Soomaaliya?

 Kooxda Xariirka Soomaaliya ee ururka Iskaashiga Islaamka waxaa la aasaasay sannadkii 2007 si ay ula socaan arrimaha Soomaaliya, horumarrada la gaarana ay u geeyaan shirarka golaha guud ee Iskaashiga Islaamka.

Kooxda Xariirka Soomaaliya waxa ay shirarkooda ku yeelan jireen New York, waxaana tillaabo wnaagsan ah in shirka loo soo wareejiyo gudaha Soomaaliya si ay u ogaadaan xaaladda dhabta ah ee ka jirta Soomaaliya.

Faa’iidada Kulanka O.I.C ee Muqdisho

Soomaaliya waa dal ka soo kabanaya dhibaatooyinkii ka dhashay codalaadihii sokeeye iyo qaran jabkii ku dhacay, waxaana yarayd rajada laga qabay in lagu qabto kulamo caalami ah, maadama ay adkayd in lagu soo dhiirado, waxaana meesha ka baxaya sheegashadii ahayd in aan dalku marti geli karin shir heer caalami ah. Shirku waxa uu horseed u noqonayaa kulamo kale oo heer caalami ah iyo in indhaha caalamka  loogu soo fiiriyo Soomaaliya si ka duwan sidii hore.

Kulanku waxa uu muujiyay in Soomaaliya soo ceshatay kaalintii ay ku lahayd fagaarayaasha  caalamka, ayna ka faa’iidaysanayso fursadda jirta, dawladdu waxa ay ku soo bandhigtay ajandayaasheeda oo ay ka mid yihiin hir-gelinta Doorasho qof iyo cod ah, xasilinta dalka, siyaasadda loo dhanyahay iyo kobcinta dhaqaalaha.

Wasiiru dawlaha arrimaha dibadda Qatar oo ah hoggaanka kooxda xariirka Soomaaliya ee ururka Iskaashiga Islaamka ayaa kulanka ka sheegay kooxda xariirka Soomaaliya iyo ururka iskaashiga Islaamku ay garab taagan yihiin DFS, dawladda uu wasiirka ka yahayna ay horay mashaariic horumarineed uga bilaawday Soomaaliya.

Waxa uu sidoo kale sheegay wasiiru dowlaha Qatar in OIC ay ilaalinayso midnimada iyo horumarka Soomaaliya, isaga oo caddeeyay in qodobadii ka soo baxay kulankaan lagu soo bandhigayo  Shirka guud ee golaha iskaashiga islaamka.

Marti-gelinta shirar waawayn

Soomaaliya waxa ay horay u marti gelisay shirar kan ka horeeyay sida kan urur gobaleedka IGAD, shirka Midawga Afrika, markaan waxaa lagu qabtay shirka kooxda Xariirka Soomaaliya ee ururka Iskaashiga Islaamka, waxaana u dhimman uun in Muqdisho lagu qabto shirka golaha wasiirrada OIC oo sannadkiiba mar dhaca iyo shir madaxeedka ururka oo sedaxdii sanbada mar la qabto.

 Shirkaan Muxuu uga duwanyahay kii Midawga Afrika ee Muqdisho lagu qabtay 1974-kii?

Shirka Midawga Afrika waxa uu ahaa shir ay leedahay qaarad kaliya, hase yeeshee shirka Kooxda Xariirka Soomaaliya ee waa heer caalami waxaana kasoo qayb galay wadamo ku yaalla qaarado kala duwan.

OIC waa Cudud dhaqaale oo laga faa’iidayn karo

Wadamada ku jira ururuka iskaashiga islaamka waxa ay haystaan fursad gacansi oo cudud dhaqaale ballaaran ay  ku sameyn karaan, Soomaaliyana waxa ay u baahan tahay in ay ansixiso  sideed sharci si badeecadaheeda ugu iib-gayso wadamada uu ka koobanyahay ururka iskaashiga islaamka

Faa’iidooyin gaar ah

Marka laga soo tago ballan qaadka caawimaadda Soomaaliya, hadana mas’uuliyiinta kulanka ka soo qayb galay waxa ay ka hadleen hannaanka Soomaaliya iyo dalalkoodu wax u wada qabsan karaan si ay uga wada macaashaan, arrintaasina waxa ay Soomaaliya u tahay fursad wanaagsan oo dhaqaalaha dalka lagu kobcin karo.

Cafinta Daymaha

Ra’iisul Wasaare Xasan Cali Khayre oo furitaankii shirka ka hadlay ayaa ku boorriyay OIC in dawr hoggaamineed ay ka qaadato dadaallada Soomaaliya daynta looga cafinayo.dalalka Islaamka oo bixiya kaalmada ugu badan ee Soomaaliya caalamku siiyo ayaa ah dawladaha Soomaaliya ku leh qayb kamid ah daynta lagu leeyahay, waxa ayna taageerooda wanaagsan ka qayb qaadan kartaa hannaanka cafinta daynta Soomaaliya si dalkeenna ay ugu furmaan albaabadda dhaqaalaha aduunyada.

Maqaamka xafiirka OIC ee Soomaaliya

Maqaamka Xafiiska Soomaaliya ee ururka Iskaashiga Islaamku ayaa sare loo qaadayaa, waxaana xafiiska oo ka shaqayn jiray isku dubba ridka howlaha bini’aadninimada la gaarsiinayaa heer Diblamaasiyadeed, taas oo ka dhigaysa Xafiiska ugu wayn ee OIC  ay ku leedahay Afrika.

 

 

 

LEAVE A REPLY